Acto de entrega de 22 vivendas rehabilitadas na localidade de Eito gracias ao proxecto de recalificación urbana financiado polo Fondo Galego de Cooperación e Solidariedade

A presidenta Vera Almeida e todos os vereadores da Cámara Municipal de Paul participaron xunto cos beneficiarios e todo o pobo de Eito no acto de entrega das 22 vivendas rehabilitadas a través do proxecto de recalificación urbana financiado polo Fondo Galego de Cooperación e Solidariedade, o Concello de Vigo e a Cámara Municipal de Paul.

 Acto de descubrimento da placa conmemorativa

A continuación reuníronse os representantes da Cámara, parte do equipo do Gabinete Técnico e os beneficiarios para comentar os resultados desta intervención financiada polo Fondo Galego de Cooperación e Solidariedade.

 Acción de intercambio de experiencias entre todos os
que participaron no desenvolvemento deste proxecto

Supervisión dos traballos de rehabilitación de 22 vivendas na localidade de Eito a través do proxecto de recalificación urbana financiado polo Fondo Galego de Cooperación e Solidariedade

Durante varias xornadas tiven a oportunidade de asistir xunto con parte do persoal do Gabinete Técnico da Cámara Municipal ás visitas de seguimento das obras de rehabilitación de 22 vivendas na localidade de Eito, financiadas polo Fondo Galego de Cooperación e Solidariedade, o Concello de Vigo e a Cámara Municipal de Paul.

Entorno de Eito

Eito é un dos principais núcleos poboacionais do municipio de Paul xunto con Cidade das Pombas, Janela e Cabo de Ribeira. O sistema urbano da localidade de Eito caracterízase por aglomerados difusos, onde a separación entre o construído e o natural é clara.

Segundo o Plan Director Municipal de Paul, a política a seguir en Eito é a da consolidación dos espazos interiores das áreas urbanizadas e a da concentración urbana en torno aos núcleos existentes.

Este proxecto de recalificación urbana ten o obxectivo principal de mellorar as condicións de vida das persoas da localidade de Eito que contan con menos recursos. Acadando as condicións mínimas de habitabilidade tamén se consegue mellorar a estética do lugar. Entre as obras executadas dentro deste proxecto financiado polo Fondo Galego de Cooperación, supervisáronse: obras de mellora dos acabados exteriores e interiores de vivendas, obras de construción e reforma de baños e cociñas e obras de rehabilitación integral de vivendas.



 

 Obras de mellora do acabado exterior dunha vivenda




Traballos de recebado exterior dunha vivenda



Rehabilitación de vivendas. Cambio de cuberta



Vivenda rehabilitada e acondicionamento de espazo para cuarto de baño

Materiais de construción empregados

Unha visita de obra moi especial

Todo comezou un día cando o arquitecto do gabinete técnico me preguntou se ao día seguinte estaba disposta a camiñar e eu respondinlle que si sen saber a onde era que íamos.
O punto de partida foi o cráter de Cova, unha caldeira volcánica, con forma circular, de 800 m de diámetro, cuxa parte inferior atópase actualmente a 1.100 m  de altitude e a súa envolvente a 1.265 m. Dende logo, un bo comezo a pesar de que non soubese que era o que estábamos facendo alí.

Panor ámica de Cova Cráter

Comezamos a subir ata chegar ao cumio da vertente nordeste da Cova, e isto foi o que me atopei.

Panorámica do Val de Paul.

A vertente nordeste da Cova descende dende os 1.200 m aos 630 m de altitude, uníndose coa Ribeira de Paul a través dun extenso túnel de lava. Nesta localización era onde se atopaba a obra que íamos visitar, a reparación do camiño que une Cova Cráter con Cabo de Ribeira. Poderédesvos imaxinar todas as dificultades que existen ao facer calquera pequena intervención neste lugar.

Imaxes do camiño de Cova Cráter a Cabo de Ribeira obxecto de intervención

E para que quede constancia de que foi unha visita a obra e non un simple paseo, a continuación vos amoso unha imaxe da visita da dirección da obra.

Visita ao Val de Paul cos técnicos do Gabinete Técnico da Cámara Municipal

O Val da Ribeira de Paul é un espazo con gran valor paisaxístico que se localiza ao norte do municipio, comeza en Cabo de Ribeira e vai de sudeste a nordeste, desaugando no Océano Atlántico na Cidade das Pombas.

Ao longo do camiño atopamos exemplos de edificacións tradicionais, consistentes en un ou máis volumes en forma de L, U ou en paralelo, con muros exteriores de pedra local e cuberta inclinada a dúas augas de palla. Aparece illada ou en pequenos grupos situados con frecuencia en lugares pouco accesibles, nas inmediacións de parcelas agrícolas, posuíndo un alto valor paisaxístico e de identidade cultural.

Atopamos tamén outra tipoloxía coñecida como “Sobrados”. Está composta por un volume prismático recto de planta rectangular, con muros exteriores de pedra, estrutura de piso e de cuberta de madeira e cuberta inclinada a catro augas de tella. Esta tipoloxía normalmente ten dous pisos e o corpo principal aparece case sempre diferenciado dos anexos. A imaxe representa a variante rural dos sobrados, que se implantan con forma de L, definindo un patio central ou lateral onde se localiza a industria (trapiches e alambiques) de produción de grogue (augardente feita coa cana de azúcar).

A agricultura practícase tanto na base do val coma por medio de socalcos e está formada por un sistema de canles de augas que regan os espazos agrícolas.

A Cidade das Pombas en Paul, o meu lugar de traballo durante este mes

 A estatua de Santo Antao preside a vila e dende aquí arriba podemos facernos á idea de como é a cidade.

A Cidade das Pombas, coma moitos outros núcleos da illa de Santo Antao é un territorio marcado polo contacto directo co Océano Atlántico e as ribeiras de desembocadura dos vales.

A Cidade das Pombas está constituída polo núcleo histórico e os núcleos máis ou menos consolidados (Passo e Paul de Baixo), separados polo leito da ribeira de Paul e ligados por unha ponte que posibilita a comunicación entre eles.

Panorámica da Cidade das Pombas

Panorámica da Cidade das Pombas

A cidade se organiza a partir de dúas vías concorrentes, unha estreita masa edificada case continua aos lados destas vías e parcelas agrícolas que non foron alteradas significativamente, sobresaíndo entre as novas construcións. Estes terreos agrícolas están fortemente implantados debido á abundancia de auga, á calidade dos terreos e á pouca presión urbana.

Entorno do concello

Praza do concello

Entorno da igrexa

Praza da igrexa

A viaxe en imaxes

Saíndo de Oporto

Saíndo de Lisboa

Deixando a Península rumbo ás illas de Cabo Verde

Sobrevoando Porto Novo na Illa de Santo Antao

Aterrando na Illa de San Vicente

En taxi dirección Mindelo

O cansancio acumulado despois dunha longa viaxe e as ganas de chegar a Paul, fixeron que esquecera fotografiar a viaxe en ferry de Mindelo (Illa de San Vicente) a Porto Novo (Illa de San Antao).

"Vacacións con Traballo" na Cámara Municipal do Paúl - Cabo Verde

O 27 de setembro viaxarei a Cabo Verde para desfrutar as miñas "Vacacións con Traballo" na Cámara Municipal do Paúl na illa de Santo Antao.

Cabo Verde ten unha superficie de 4.032 km2 e está localizado no punto máis occidental do continente africano, a 600 km de Senegal.

Son un total de 10 illas de configuración desértica, volcánica e tropical, divididas en dous distritos: as de Sotavento, situadas ao Sur (Santiago, Maio, Fogo e Brava), con capital en Praia; e as de Barlovento ao Norte (Santo Antao, Sao Vicente, Santa Luzía, Sao Nicolau, Sal e Boavista), con capital en Mindelo.

O clima é árido, con veráns quentes e secos. Son frecuentes as sequías, polo que resulta preocupante a escaseza de auga, afectando seriamente ás actividades agrícolas e gandeiras (só un 10% do solo está cultivado). Isto determina unha forte dependencia das importacións de alimentos, así como tamén  de hidrocarburos.

Santo Antao é a segunda illa maior do arquipélago en superficie e a terceira en poboación, con aproximadamente 40 km de extensión lonxitudinal e preto de 20 km de anchura. De orixe volcánico, Santo Antao é a illa máis setentrional e occidental de Cabo Verde e a máis afastada do continente africano. A canle de San Vicente sepáraa da illa máis próxima, a illa de San Vicente. Os seus principais asentamentos urbanos son a vila de Ribeira Grande, Porto Novo e Ponta do Sol.

O Paúl está situado na costa nordeste da illa de Santo Antao, entre a Ponta da Tumba e a Ponta de Saudade. A área total do municipio é de 54,3 km2.

O Municipio de Paúl ten un terreo moi accidentado e extremadamente montañoso. Só un terzo das terras son cultivables e un quinto dos terreos son adecuados para a construción. Estes factores son unha forte condicionante para o desenvolvemento da agricultura, dos procesos de urbanización e de infraestruturas en xeral.